"8 avqust Gürcüstan üçün faciəli tarixdir və bu, o dövrün hakimiyyəti tərəfindən həyata keçirilmiş ən ağır avantüra və xəyanət idi. Bu gün bizə xatırladır ki, ölkəni suveren hakimiyyət idarə etməlidir".

Missiya.Az xəbər verir ki, bu sözləri Gürcüstanın Baş naziri İrakli Kobaxidze Rusiya ilə müharibə zamanı həlak olmuş insanların məzarlarını ziyarət edərkən jurnalistlərə müsahibəsi zamanı deyib.

Onun sözlərinə görə, hakim “Gürcü Arzusu” partiyası ölkənin müstəqilliyini sonadək qoruyacaq ki, belə cinayətlər təkrarlanmasın. 

“Biz 2008-ci il müharibəsində həlak olanların xatirəsini yad edirik. Avqust müharibəsində 400-dən çox insan, o cümlədən qəhrəman hərbçilərimiz və əsgərlərimiz vətənimizin şərəfini qoruyaraq, həlak oldular. Bu gün bizə xatırladır ki, ölkəni yalnız suveren hakimiyyət idarə etməlidir, elə hakimiyyət ki, yalnız milli maraqlarla hərəkət edir, xarici güclərin diktəsi ilə yox”, - deyə siyasətçi vurğulayıb.

Daşqın Həsənov
Missiya.Az