Türkiyənin yanğınlar baş verən bölgələrindən dəhşətli fotolar yayılıb. Fotolarda meşəlik ərazilərin yanğından əvvəlki və sonrakı görüntüləri öz əksini tapıb. Görüntülər Muğla şəhərinin Marmaris qəsəbəsində, qəsəbənin inzibati ərazisinə daxil olan Bağlı İçmələr və Armutalan məhlələrində çəkilib. 

Dronla çəkilən şəkillərdə yanğın nəticəsində minlərlə hektar yaşıllıq ərazinin zərər gördüyü, yaşayış məntəqələrinin yanmaq təhlükəsindən son anda xilas olduğu öz əksini tapıb. Yaşayış məntəqələrinə yaxın ərazilərdə yerləşən meşə zolaqlarına ziyan dəyməyib. 

Artıq həmin ərazilərdə yanğınlar nəzarət altına alınıb, çox hissəsində isə tamamilə söndürülüb. 

Türkiyənin əkin və meşə təssərrüfatı naziri Bəkir Pakdəmirlinin ölkə ərazisindəki meşə yanğınları ilə bağlı paylaşında 117 aktiv yanğın ocağından 111-nin lokallaşdırıldığı qeyd edilib. Hazırda Antalyada 2, Muğlada 3, Tuncəlidə 1 yanğının nəzarət altına alınmasıyla bağlı işlər davam etdirilir.

Qeyd edək ki, Azərbaycan Respublikasının Prezidenti İlham Əliyevin tapşırığına uyğun olaraq, meşə yanğınlarının söndürülməsi və daha geniş miqyas almasına imkan verilməməsi məqsədilə Fövqəladə Hallar Nazirliyinin müvafiq yanğınsöndürmə qüvvələrinin 100 nəfər əməkdaşından ibarət ilk qrup iyulun 30-da Türkiyə Respublikasına yola düşüb.

İyulun 31-də isə Türkiyəyə daha bir qrup yola düşüb. Bu yanğın-xilasetmə qrupuna 1 ədəd helikopter, 53 ədəd yanğınsöndürmə və xüsusi təyinatlı xilasetmə texnikaları, 220 nəfər yanğınsöndürən və xilasedici daxildir.



Elvin
Missiya.Az