Ramazan ayı İslam aləmində on bir ayın sultanı adlanır. Müsəlmanlar oruc tutmaqla İslam dininin əsas şərtlərindən birini yerinə yetirirlər. Ramazan ayı həm də xüsusi tərbiyəvi əhəmiyyətə malikdir.

İlahi hikmətlər xəzinəsi Qurani-Kərimin nazil olduğu mübarək Ramazan ayı insanları gözəl niyyətlər və xeyirxah əməllər naminə birliyə çağırır, onları əmin-amanlıq, qardaşlıq və bərabərlik yoluna dəvət edir. 

Orucluğun başa çatdığı gün Fitr bayramı başlayır. Həmin gün hər kəs bir-birini təbrik edir, qohum-əqraba, böyüklər və xəstələr, vəfat edənlərin qəbirləri ziyarət edilir, ruhlarına dualar oxunur. Bayram günü hər kəs öz himayəsində olanlar üçün təqribən 3 kiloqram buğda, yaxud xurma və ya kişmiş miqdarında kasıblar üçün fitrə zəkatı verməlidir. 

Bütün müsəlmanlar Ramazan bayramını qeyd edir. Ramazan bayramı dünya müsəlmanları üçün ən müqəddəs mərasimlərdən sayılır. Milli və dini tolerantlığın hökm sürdüyü ölkəmizdə bütün dini bayramlar, o cümlədən Ramazan bayramı hər il təntənə ilə qeyd edilir.

Bayramınız mübarək!

Missiya.Az