"Tbilisi Avropa İttifaqının vizasız rejimə yenidən baxmaqla hədələyən ultimatumlarından qorxmur". 

Missiya.Az xarici mediaya istinadən xəbər verir ki, bu barədə Gürcüstanın Baş naziri İrakli Kobaxidze bildirib.

Kobaxidze deyib ki, Gürcüstan ölkədə inqilablara mane olan, Tbilisinin Avropa İttifaqı ilə vizasız rejimini dayandırmaqla hədələyən qanunları ləğv etməyəcək.

Baş nazirin sözlərinə görə, Brüssel “Sovet Moskvası” ruhunda hərəkət etməməlidir, hər bir iddia əsaslandırılmalı, “boş ultimatumlardan” qaçmaq vacibdir. Ölkəmiz üçün ailə dəyərlərini qoruyan, eyni zamanda xarici dövlətlərin maraqları naminə fəaliyyət göstərən təşkilatların maliyyələşdirilməsinə nəzarət etməyə imkan verən qanunlar vacibdir. 

Kobaxidze məhbuslarla bağlı iddialara da münasibət bildirib. Baş nazirin sözlərinə görə, hər bir iş üzrə cinayət təqibi əsaslandırılır və törədilmiş cinayətlərin faktları ilə sübuta yetirilir: 

"Xahiş edirəm, bu işlərlə bağlı hüquqi sualları varsa, hüquqi arqumentlər təqdim etsinlər. Təbii ki, belə suallar yoxdur. Ona görə də biz boş siyasi ultimatumlarla qarşılaşırıq ki, bu da çox acınacaqlıdır". 

Xatırladaq ki, bundan əvvəl Avropa Komissiyası Gürcüstan Xarici İşlər Nazirliyinin rəhbəri Maka Boçorişviliyə məktub göndərərək Brüsselə uyğun gəlməyən bir sıra qanunların ləğvi ilə bağlı tövsiyələr vermişdi. Bəyanatda Tbilisinin reaksiyasının vizanın dayandırılması mexanizmi ilə bağlı hesabatda göstəriləcəyi bildirilir.

Nurlana Əhmədova
Missiya.Az