İran Prezidenti Məsud Pezeşkian qeyri-rəsmi səfər çərçivəsində Təbrizə gedərkən maraqlı insidentlə qarşılaşıb. 

Missiya.Az xəbər verir ki, bu barədə İran Prezidentinin xüsusi müfəttişi Mustafa Moləvi məlumat verib.

Onun sözlərinə görə, Prezidentin kortejindəki bütün avtomobillər Qəzvin əyaləti yaxınlığında dayanmalı olub. 

Moləvi bildirib ki, kortej Rəşt magistralının çıxışında yerləşən bir yanacaqdoldurma məntəqəsində benzin doldurduqdan sonra hərəkətə davam edib. 

“Takestan şəhəri yaxınlığında hər üç avtomobil nasazlıq səbəbindən dayanıb. Texniki baxış zamanı məlum olub ki, avtomobillərə vurulan benzin su ilə qarışıq olub”, - deyə o vurğulayıb.

Qeyd olunub ki, eyni yanacaqdoldurma məntəqəsində bundan əvvəl də oxşar keyfiyyətsizlik halları qeydə alınıb. Hadisəyə rəğmən, Pezeşkian əyalət rəhbərliyi ilə əlaqə saxlamayıb və rəsmi araşdırma başlanmayıb. Bunun əvəzinə o, şəxsi taksi tutaraq səfərini Təbrizə qədər bu yolla davam etdirib. 

Daşqın Həsənov
Missiya.Az