Hazırda 85 yaşı olan İranın ali dini lideri Seyid Əli Xamenei tezliklə hakimiyyəti təhvil verə bilər. 

Missiya.Az xəbər verir ki, bu barədə “Reuters” agentliyi məsələ ilə bağlı məlumatlı beş mənbəyə istinadən məlumat yayıb.

Bildirilib ki, İranın növbəti ali liderini seçmək komitəsi öz işini gücləndirib. Qapalı qurum iki il əvvəl Xamenei tərəfindən yaradılıb və üç yüksək səviyyəli ruhanidən ibarətdir.

Məlumata görə, hazırda iki əsas fiqur müzakirə olunur: 

“Xameneinin 56 yaşlı oğlu Müctəba Xamenei. O, İran İslam İnqilabı Keşikçiləri Korpusuna (SEPAH) yaxın sərt mühafizəkar kimi tanınır və müxalifəti sıxışdırmaq, o cümlədən sərt xarici siyasət yeritmək barədə atasının fikirlərini tam bölüşür. Həsən Xomeyni İslam Respublikasının qurucusu Ruhullah Xomeyninin nəvəsidir. O, siyasi və sosial məhdudiyyətlərin yumşaldılmasını müdafiə edən islahatçı düşərgə ilə əlaqələndirilir, lakin eyni zamanda keçmişinə görə yüksək səviyyəli din xadimləri və bəzi SEPAH-ın yüksək rütbəli rəsmiləri arasında hörmət qazanıb”, - deyə vurğulanıb.

Lakin mənbələr yekun qərarın hələ verilmədiyini qeyd edib:

“Namizədlər dəyişə bilər, amma son söz yenə də Xameneinin özünə məxsusdur”, - deyə əlavə olunub.

Daşqın Həsənov
Missiya.Az