“ABŞ-nin İrana qarşı sanksiyaları səbəbindən Tehran Vaşinqtonla birbaşa danışıqlar apara bilmir”.

Missiya.Az “Lenta.ru”ya istinadən xəbər verir ki, bunu İranın xarici işlər naziri Abbas Əraqçi Moskvada rusiyalı həmkarı Sergey Lavrovla danışıqlardan sonra keçirilən mətbuat konfransında deyib.

“Hazırda biz yalnız dolayı danışıqlar aparacağıq. ABŞ-nin səsləndirdiyi təhdidlər, eləcə də ölkəmizə qarşı iqtisadi sanksiyalar və təzyiqlər səbəbindən onlarla birbaşa danışıqlar apara bilmirik”, - deyə siyasətçi vurğulayıb.

Əraqçı bildirib ki, ölkələr arasında razılığın əldə olunması yalnız o halda mümkündür ki, Vaşinqton öz niyyətlərinin ciddiliyini nümayiş etdirsin və Tehran qarşısında qeyri-real şərtlər qoymasın.

Qeyd edək ki, İran və ABŞ arasında dolayı danışıqlar aprelin 12-də Omanda baş tutub. İran tərəfini xarici işlər naziri Abbas Əraqçi, Amerika tərəfini isə ABŞ Prezidenti Donald Trampın xüsusi nümayəndəsi Stiven Vitkov təmsil edib.

Daşqın Həsənov
Missiya.Az