Aİ-nin bir sıra ölkələri Rusiyaya qarşı sanksiyaları qəbul edərkən Macarıstanın vetosundan yan keçmək imkanını nəzərdən keçirir.

Missiya.Az xəbər verir ki, bu barədə Avropa İttifaqının (Aİ) diplomatik dairələrindəki mənbələrə istinadən "Politico" nəşri məlumat yayıb.

Qeyd olunub ki, ən azı altı ölkə sanksiyaların milli qanunvericilik sferasına köçürülməsi variantını müzakirə edir. Həmin sanksiyaların hər altı aydan bir uzadılması tələb olunan Aİ səviyyəsində yekdil razılığa ehtiyacın qarşısını alacaq.  

Nəşrin mənbələrindən biri bildirib ki, sanksiyalar rejiminin davamlılığını təmin etmək lazımdır, çünki məhdudiyyətlərin gələcəkdə uzadılmaması riski var. Başqa bir diplomat vurğulayıb ki, Macarıstanın mümkün blokadası ciddi problem olacaq, lakin Aİ bundan çıxmaq üçün yollar tapacaq.

"Politico"nun fikrincə, vetodan yayınmağa imkan verəcək mexanizmin yaradılması üçün artıq hüquqi iş aparılır.

Qeyd olunur ki, Aİ ölkələrinin heç də hamısı sanksiyalar məsələsini milli səviyyəyə keçirə bilməz və “ayrı yanaşma” məhdudlaşdırıcı tədbirlərin ümumi təsirini zəiflədəcək. Bundan əlavə, Ukraynanın Aİ-dəki müttəfiqləri ABŞ-la birləşmiş sanksiya cəbhəsini zəiflədə biləcək addımlar atmaqdan ehtiyatlanırlar - xüsusilə də Donald Trampın Rusiya ilə münasibətləri normallaşdırmaq istəyi ilə bağlı bəyanatları fonunda.

Zərintac Mayisqızı
Missiya.Az