Göygöl rayonunun Qızılqaya qəsəbəsində (həmin ərazi Gəncə şəhəri, Gülüstan yaşayış massivi kimi də tanınır) yaşayan bir qrup şəxs Missiya.Az-a müraciət edərək deyiblər ki, sözügedən yerdə yeni yaşayış evləri tikilir.

Vətəndaşlar iddia edirlər ki, Qaz İdarəsi həmin yeni tikililərə qaz çəkmək məqsədilə qəsəbənin bütün qaz təchizatını dayandırıblar. Hazırda havalar çox soyuq olduğu üçün sakinlər əziyyət çəkir. Onlar istəyirlər ki, yeni evlərə qaz təchizatı havalar isinməyə başlayanda davam edilsin.

Məsələni araşdırmaq üçün “Azəriqaz” İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyevlə əlaqə saxladıq.

Onun sözlərinə görə həmin ərazidə nə dünən, nə də bu gün qazın verilişində dayanma olmayıb.

"Sadəcə həftənin 1-ci günü 530 diametrlik boru xəttimizdə zədələnmə halı olmuşdu. Ona görə müvəqqəti fasilə yaranmışdı. Hazırda qazın verilişində heç bir problem yoxdur", - E. Vəliyev qeyd edib.

Lakin yenidən şikayətçilərlə əlaqə saxladığımız zaman onlar qazın hələ də gəlmədiyini və hava soyuq olduğundan çox böyük çətinliklərlə üz-üzə qaldıqlarını vurğulayıblar.

Zərintac Mayisqızı
Missiya.Az