Noyabrın 27-də Suriyada keçmiş prezident Bəşər Əsəd rejiminə qarşı başlanan silahlı üsyan dekabrın 8-də Dəməşqin alınması və rejimin devrilməsi ilə başa çatdı. Bu hadisə Suriya ordusunun zəifliyini ortaya qoydu. Rejimin aviasiyası məğlub oldu və quru qoşunları faktiki olaraq dağıldı.

Missiya.Az xəbər verir ki, bu barədə “The Telegraph” yazı dərc edib.

“Müxalifətin sürətlə irəliləməsi Rusiyanın lazımınca qiymətləndirilməyən problemlərini də ortaya qoydu. Rusiya qoşunları Əsəd rejiminə dəstək versə də, müxalifət şəhərləri bir-bir ələ keçirdikcə fəal müdaxilə etməyib. Rusiya prezidenti Vladimir Putin üçün bu seçim deyildi. Kreml rəhbəri Moskvanın Suriyadakı əsas quru qüvvələrinə çevrilmiş özəl hərbi şirkət olan "Vaqner” qrupuna arxalanırdı. Lakin muzdlulardan asılılıq həm qruplaşmanı, həm də Suriya rejimini məhv etdi”, - deyə vurğulanıb.

Qeyd olunub ki, bu, bütün hökumətlər üçün bir dərsdir. Muzdlular dövlət siyasətinin etibarlı aləti deyil və onlara arxalanan istənilən dövlət uğursuzluqla üzləşir.

Daşqın Həsənov
Missiya.Az