Ermənistanın baş naziri Nikol Paşinyan İrəvanla Tbilisi arasındakı münasibətləri regionda əməkdaşlıq modeli adlandırıb. 

Missiya.Az “Sputnik-Armenia”ya istinadən xəbər verir ki, o, bu barədə Tbilisidə gürcü həmkarı İrakli Kobaxidze ilə birgə mətbuat konfransında bildirib.

“Ermənistan və Gürcüstan arasındakı münasibətlər bizim region ölkələri arasında qarşılıqlı hörmət, ümumi maraqlar və iqtisadi əməkdaşlığa əsaslanan qarşılıqlı fəaliyyətin necə inkişaf etməli olduğuna dair baxışımızı əks etdirir”, - deyə Paşinyan vurğulayıb.

Paşinyan qeyd edib ki, İrakli Kobaxidze ilə görüşdə İrəvanla Bakı arasında mövcud münasibətlər, sərhədlərin delimitasiyası və demarkasiyası prosesi, eləcə də əldə olunan razılaşmalar müzakirə olunub.

"İrəvan gözləyir ki, yaxın gələcəkdə Azərbaycan-Ermənistan sərhədinin delimitasiyası məsələsində konkret irəliləyiş əldə etmək mümkün olacaq", - deyə siyasətçi əlavə edib.

Paşinyan bildirib ki, görüşdə bu məsələ müzakirə olunub və hər iki tərəfin onun həlli ilə bağlı ümumi anlayışı var.

Daşqın Həsənov
Missiya.Az