"Naxçıvanın çox işıqlı gələcək gözləyir. Prezidentin Naxçıvan üzrə səlahiyyətli nümayəndəsi Fuad Nəcəfli ilə bu gün TAİB nümayəndələri olaraq keçirdiyimiz görüş, onun yeni layihələrlə bağlı açıqlamaları bunu deməyə əsas verir".

Missiya.Az xəbər verir ki, bu sözləri Missiya Media Qrupunun baş redaktoru Nicat Dağlar Naxçıvan səfəri ilə bağlı öz "facebook" hesabında yazıb.

Nicat Dağların sözlərinə görə, diqqətçəkən məqam həm də Fuad Nəcəflinin məsələlərə konseptual yanaşması, layihələrdə dayanıqlı inkişaf strategiyasına əsaslanması olub: 

"Söhbət heç də primitiv ticarət və iaşə obyektlərinin tikintisindən yox, gələcək onilliklərdə də Naxçıvan əhalisinin sosial rifah halına, MR-in iqtisadi inkişafına xidmət edəcək nəhəng istehsal projelərindən, ixracat potensialının yüksəlməsinə səbəb olacaq proqramlardan gedir. Sevindirici hal odur ki, Naxçıvan rəhbərliyi həm problemlərin həllinə, həm də yeni layihələrin icrasına ümumxalq maraqları, əhalinin gözləntiləri xüsusunda yanaşır. Bura yüksək intellekti, dövlətə, xalqa xidmət etmək istəyini də əlavə etsək, Naxçıvanın unikal inkişaf göstəriciləri əldə edəcəyinə böyük ümidlər yaranır".