“İRƏLİ” İctimai Birliyinin dəstəyi, “3 Sual” intellektual oyun platformasının təşkilatçılığı ilə Bakı İntellekt Liqası üzrə mövsüm oyunları davam edir.

Birliyin Mətbuat xidmətindən Missiya.Az-a məlumat verilib ki, Liqanın mövsüm oyunları peşəkar və inkişaf divizionu olmaqla 2 kateqoriyadan ibarətdir.

Peşəkar divizionun tərkibində təcrübəli, inkişaf divizionunun tərkibində isə yeni komandalar yarışırlar.

Bildirilib ki, “Nə? Harada? Nə zaman?” formatında keçirilən liqanın bu dəfəki mövsümündə hər iki divizion üzrə 7 yarış olmaqla hər oyunda 30 sual oynanılıb. 300-dən artıq gəncin iştirakı ilə keçirilən yarışlarda peşəkar divizion üzrə “Vendomat NX” komandası 107, inkişaf divizionu üzrə isə “Atmos” komandası 197 xalla ilk sırada qərarlaşıb.

Diqqətə çatdırılıb ki, həyata keçirilən tədbirlərin əsas məqsədi gənclərin asudə vaxtının səmərəli təşkilinə töhfə vermək, iştirakçıların intellektual oyunlara marağı artıraraq şəbəkələşməsini təmin etmək, habelə bilik və bacarıqlarını daha da möhkəmləndirməkdir.

Qarşıdakı günlərdə Bakı İntellekt Liqası üzrə hər iki divizionun daha 2 oyununun keçirilməsi planlaşdırılır.