"Vaşinqton sazişinin İran və Rusiya üçün çox ciddi faydaları var. Bu saziş həyata keçirildikdə İran dəmir yolu ilə Fars körfəzindən Qara dənizə çıxış əldə edəcək. Bundan əlavə, Rusiya və İran iki ölkə arasında dəmir yolu əlaqəsi yarada biləcək".

Missiya.Az xəbər verir ki, bu sözləri Ermənistanın Baş naziri Nikol Paşinyan “Fox News” telekanalına müsahibəsində deyib.

“Demək istədiyim odur ki, əgər biz bu sazişin iqtisadi tərəfinə diqqət yetirsək, o zaman təkcə Ermənistan, Azərbaycan, ABŞ və Türkiyə deyil, həm də Rusiya və İran görünməmiş faydalar əldə edəcəklər”, - deyə siyasətçi vurğulayıb.

Paşinyan qeyd edib ki, ona görə də mən bunu beynəlxalq sabitlik və təhlükəsizlik çərçivəsində bütün ölkələrə, o cümlədən, bütün beynəlxalq ictimaiyyətə əhəmiyyətli faydalar gətirə biləcək çox mühüm saziş hesab edirəm.

“Mən artıq qeyd etdim ki, bizim sülh yollarının kəsişməsi adlı layihəmiz var və həqiqətən də bu saziş əməkdaşlığın qovşağına çevrilə bilər və bizim məqsədimiz məhz budur”, - deyə siyasətçi bildirib.

Daşqın Həsənov
Missiya.Az