“Bu hökumət ölkəni silahlandırmaq, müharibə aparmaq, diplomatik kanallarla işləmək və müttəfiqlər vasitəsilə problemlərini həll etmək iqtidarında deyil. Ermənistan suveren ölkə olmaq iradəsini tamamilə itirib və Azərbaycana tabe olmaq üçün ardıcıl addımlar atır”.

Missiya.Az “Hraparak” nəşrinə istinadən xəbər verir ki, bunu erməni jurnalist Anania Mahakyan deyib.

O, bildirib ki, 44 günlük müharibədən indiyə kimi Ermənistan tərəfindən heç bir ciddi hazırlıq addımı atılmadı və nəticədə ölkəmiz nokdaun vəziyyətinə düşdü. 

“İndi müharibənin başlanmasının real təhlükəsi hər saniyə Ermənistanın üzərində Damokl qılıncı kimi asılır. Hakimiyyət isə ciddi strategiya və taktika işləyib qurtuluş naminə bütün qüvvələri səfərbər etməyə çalışmaq əvəzinə əyilib Azərbaycanın göstərişini gözləyir və məzmunundan asılı olmayaraq hər şeyə, ən alçaldıcı tələblərə boyun əyməyə hazırdır”, - deyə erməni jurnalist vurğulayıb.

Mahakyan qeyd edib ki, sərhədlərin müəyyən edilməsi ilə bağlı Azərbaycan prezidenti İlham Əliyev öz mövqeyindən bir addım da geri çəkilməyəcək.

Daşqın Həsənov
Missiya.Az