Martın 31-də Rusiya prezidenti Vladimir Putin ölkənin xarici siyasətinin yenilənmiş konsepsiyasını təsdiq edən fərman imzalayıb. 

Missiya.Az xarici KİV-nə istinadən xəbər verir ki, bu barədə Putin Rusiya Federasiyası Təhlükəsizlik Şurasının daimi üzvləri ilə görüşü zamanı məlumat verib.

Siyasətçi bildirib ki, yeni xarici siyasət konsepsiyası orta və uzunmüddətli perspektivdə əməli fəaliyyətlərin əsasını təşkil edəcək.

“Bu, orta və daha uzaq gələcəkdə əməli fəaliyyətlərimizin əsasını təşkil edəcək balanslaşdırılmış sənəd oldu”, - deyə Putin vurğulayıb.

Onun sözlərinə görə, yeni xarici siyasət konsepsiyası beynəlxalq məsələlər üzrə gələcək iş üçün sağlam doktrina əsası rolunu oynayır.

Putin eyni zamanda ümumi xarici siyasətin həyata keçirilməsində iştirak edən həmkarlarından konstruktiv fikirli tərəfdaşlarla əlaqələrin genişləndirilməsinə və qeyri-dost dövlətlərin Rusiyaya qarşı düşmənçilik siyasətindən əl çəkməsinə şərait yaratmağa xüsusi diqqət yetirməyi xahiş edib.

Daşqın Həsənov
Missiya.Az