İsrail yaxın günlərdə hətta ABŞ-nin dəstəyi olmadan da İrana qarşı birtərəfli hərbi əməliyyatları nəzərdən keçirir.

Missiya.Az xəbər verir ki, bu barədə “Sky News” mənbələrə istinadən məlumat yayıb.

İsrailin planlarını ABŞ-nin İranla diplomatik nizamlanmaya dair danışıqlar aparması ilə bağlı xəbərlər gücləndirib. Bununla belə, İsrail potensial razılaşmanın bəzi müddəalarını, xüsusən də uranın icazə verilən zənginləşdirilməsini qəbuledilməz hesab edir.

Məlumata görə, hücum ehtimalı Vaşinqtonda narahatlıq yaradıb. Buna cavab olaraq, Birləşmiş Ştatlar regiondakı İran raketlərinin uçuş məsafəsində ola biləcək səfirliklərə təhdidlərin qiymətləndirilməsinə hazırlaşmağı əmr edib. Vaşinqton həmçinin ABŞ-nin Bağdaddakı səfirliyindən qeyri-vacib personalı təxliyə etməyə başlayıb, o cümlədən Bəhreyn və Küveytdəki işçilərə oranı tərk etmək imkanı verib.

Qeyd olunub ki, ABŞ Prezidenti Donald Trampın administrasiyası İsrailin mümkün hərəkətləri ilə bağlı Konqresə hələlik rəsmi məlumat verməyib. 

Daşqın Həsənov
Missiya.Az