Uşağınızın asanlıqla yuxuya getməsini və daha yaxşı yuxu almasını istəyirsinizsə, onu doğru zamanda yatağa qoymağa çalışın. Heç kim mübahisə etmir ki, hər bir uşaq unikaldır və yuxu diapazonu kifayət qədər genişdir.

Missiya.Az xarici mətbuata istinadən xəbər verir ki, bununla belə, müəyyən yaş qruplarında olan uşaqlar üçün xarakterik olan bəzi xüsusiyyətlər var. Altı aya qədər körpənin gündəlik rejimi qidalanma ilə sıx bağlıdır. Bu dövrdə azyaşlılar gündə bir neçə dəfə yatır və çox vaxt gündüz-gecə yuxusunun müddətini ayırd etmirlər. Təxminən iki-üç aydan körpələrdə yuxu hormonu olan melatoninin sintezi ilə əlaqəli bioloji saat yaranmağa başlayır. Melatonin gün ərzində bədəndə toplanır və yuxuya səbəb olur. Tipik olaraq, yuxu pəncərəsi 18:30-dan 20:30-a qədər açılır, lakin yorğunluq əlamətlərini izləmək daha yaxşıdır: gözlərini ovuşdura, əsnəyə bilər, hərəkətləri və reaksiyaları daha yavaş olacaq. 6 aydan bir il yarıma qədər olan uşaqlarda qidalanma cədvəli daha sabit olur və onların yuxusu artıq yeməkdən o qədər də asılı deyil. Bu yaşda körpələr gün ərzində aktivləşirlər, bu da gecə yuxusunun müddətinin artmasına səbəb olur, çünki orqanizm daha çox istirahətə ehtiyac duyur. Bu, adi yuxu pəncərəsini dəyişə bilər və uşaq daha tez yatmaq istəyəcək.

1,5 yaşdan 3 yaşa qədər olan uşaqlar üçün gün ərzində bir dəfə yatmaq səciyyəvidir və balacanın yeni rejimə uyğunlaşması səbəbindən gecə yuxusu qeyri-sabitdir: bu dövrdə bir çox uşaq bağçaya getməyə başlayır ki, bu da yorğunluq və şıltaqlığa səbəb ola bilər. Bu çətin dövrdə yataqdan əvvəl rituallar xüsusilə vacib olur: kitab oxumaq, pijama seçmək, vanna qəbul etmək. Bu ritualları yeməkdən 1,5-2 saat sonra başlamaq məsləhətdir.

Zərintac Mayisqızı
Missiya.Az