Rusiya və Türkiyə liderləri Vladimir Putin və Rəcəb Tayyib Ərdoğan Şanxay Əməkdaşlıq Təşkilatının (ŞƏT) Astanada keçirilən sammitində Rusiya prezidentinin Türkiyəyə səfərinin perspektivlərini müzakirə edəcəklər.

Missiya.Az xəbər verir ki, bu barədə iyulun 3-də Kremlin rəsmi nümayəndəsi Dmitri Peskov jurnalistlərə bildirib.

“Prezident Putinin Türkiyə Cümhuriyyətinə səfəri mövzusu gündəmdə qalır, o, razılaşdırıla bilən zaman mütləq baş tutacaq. Bu gün belə bir səfərin perspektivlərini müzakirə etmək üçün yaxşı fürsət olacaq”, - Peskov bildirib.

O qeyd edib ki, liderlərlə Astanada görüşmək qərarı qarşılıqlı olub. İkitərəfli görüşün çox uzun olacağı və ən azı bir saat davam edəcəyi planlaşdırılır. Kremlin rəsmi nümayəndəsi deyib ki, Moskva ilə Ankara arasında normal iş prosesinin əlaməti olan həll edilməmiş məsələlər qalır, çünki ikitərəfli münasibətlərlə bağlı çox iş görülən yerdə onlar qaçılmaz olaraq ortaya çıxır.

Eyni zamanda, Kremlin rəsmi nümayəndəsinin sözlərinə görə, onların həlli üçün siyasi iradə var, dövlətlərarası münasibətlər və ticarət-iqtisadi qarşılıqlı fəaliyyətin lazımi səviyyəsi var. Peskov əlavə edib ki, prezidentlərin görüşünün gündəmində Suriyadakı vəziyyət olacaq.

Zərintac Mayisqızı
Missiya.Az