Fransaya məxsus Korsika adasının yerli parlamentində Korsika dilinin qadağan edilməsi ada sakinlərini yenidən qəzəbləndirməklə yanaşı, beynəlxalq aləmdə və mətbuatda böyük əks-səda doğurub və etirazlara səbəb olub.

Missiya.Az xəbər verir ki, bu barədə Fransanın “France24” telekanalı məlumat yayıb.

Məlumata görə, “Korsika liderləri adanın parlamentində yerli dildən istifadəyə qadağa qoyulmasını tənqid edirlər” sərlövhəli məqalədə Korsikanın muxtariyyətinin tərəfdarı olan siyasətçilərin məhkəmənin adanın yerli parlamentində Korsika dilinin istifadəsini qadağan etməsindən sonra ayağa qalxdıqları bildirilib. Diqqətə çatdırılıb ki, italyan dilinə daha yaxın olan və təxminən 150 min nəfərin ana dili hesab edilən Korsika dili UNESCO tərəfindən “tamamilə məhv olmaq təhlükəsi ilə üzləşmiş” hesab edilib.

Adanın İcraiyyə Şurasının prezidenti Jil Simeoni və Korsika Assambleyasının prezidenti Mari-Antuanet Mopertüi Bastiya şəhər məhkəməsinin verdiyi qərarın “Korsika parlamentinin üzvlərinin debatlar zamanı öz dillərində danışmaq hüququndan məhrum etmək” demək olduğunu vurğulayıblar.

Korsikanın müstəqilliyinin tərəfdarı olan "Core in Fronte" partiyası tviter hesabında bu qərarı “rüsvayçı” hesab edib.

Leyla SƏMƏNDƏR

Missiya.Az