“Türkiyədə hamı xarici işlər naziri Hakan Fidanın adını bilir, amma ictimaiyyət onun haqqında çox az məlumata sahibdir”.

Missiya.Az xəbər verir ki, bu barədə Almaniyanın “RND” telekanalı yayım hazırlayıb.

“13 il Türkiyə Milli İstihbarat Təşkilatının (MİT) rəhbəri işləyən Fidan qədər sirləri bilən yoxdur. Bu onu Türkiyənin ən güclü adamlarından biri edir”, - deyə məlumatda vurğulanıb.

Mənbənin sözlərinə görə, Fidanın dövründə təşkilat xaricdəki fəaliyyətini xeyli genişləndirib:

“Türkiyə Şimali İraq, Suriya və Liviyada hərbi əməliyyatlarını genişləndirib. Son illərdə MİT agentləri Fətullah Gülənin tərəfdarlarını Türkiyəyə gətirməyi bacarıb”, - deyə məlumatda bildirilib.

Qeyd olunub ki, indi ilk dəfədir ki, Fidan xarici işlər nazirliyinə rəhbərlik edir:

“Amma xarici siyasət onun üçün yeni sahə deyil. O, illərlə bütün əsas xarici siyasət qərarlarında bir çox rollarda iştirak edib. O, İsrail və Misirlə yaxınlaşma üçün gizli danışıqlar hazırladı, Ukrayna münaqişəsində vasitəçilik etmək üçün Kiyev və Moskva ilə sıx əlaqə saxladı. Fidanın beynəlxalq əlaqələri güclüdür. Fidan Türkiyə prezidenti Rəcəb Tayyib Ərdoğan və keçmiş xarici işlər naziri Mövlud Çavuşoğlunu Vaşinqton və Moskva kimi bir çox mühüm səfərlərdə müşayiət edib", - deyə əlavə olunub.

Daşqın Həsənov
Missiya.Az