“Bu gün 2400-dən çox məzunun universitet həyatına vida edərək yeni bir mərhələyə qədəm qoyması bizim üçün həm qürurverici, həm də böyük məsuliyyət daşıyan bir andır. Onların hər biri bu illər ərzində yalnız peşə bilikləri qazanmayıb, həm də milli və sosial dəyərlərlə formalaşıb".

Missiya.Az-ın xəbərinə görə, bu sözləri professor, Azərbaycan Memarlıq və İnşaat Universitetinin rektoru Gülçöhrə Məmmədova AZMİU-nu 2024/2025-ci tədris ilində başa vurmuş tələbələrin “Məzun Günü” münasibətilə keçirilən tədbirdə deyib.

"Əminik ki, bu gənclər ölkəmizin memarlıq, inşaat mühəndisliyi, kommunikasiya sistemləri və dizayn sahələrində müasir bilikləri ilə seçilən, dinamik və yenilikçi mütəxəssislər kimi fəaliyyət göstərəcəklər. Məzunlarımızın ölkənin inkişafında, xüsusilə də azad edilmiş ərazilərdə aparılan quruculuq işlərində fəal iştirakı bizim üçün mühüm əhəmiyyət daşıyır. Mən bütün məzunlarımızı səmimi qəlbdən təbrik edir, onlara uğurlu gələcək arzulayıram”, - o əlavə edib.