“Böyük Britaniyanın kəşfiyyat orqanları Kaxovka su elektrik stansiyasının dağıdılmasının bütün təfərrüatlarını müəyyənləşdirir. Onlar bəndin partlamasının arxasında məhz kimin dayandığını müəyyən etməli olacaqlar”.

Missiya.Az “Sky News”a istinadən xəbər verir ki, bunu Böyük Britaniyanın baş naziri Rişi Sunak deyib.

Siyasətçi bildirib ki, əgər bunun qəsdən baş verdiyi sübut oluna bilsə, o zaman bu, hesab edirəm ki, müharibənin başlanğıcından bəri Ukraynada mülki infrastruktura edilən ən böyük hücum olacaq.

Onun sözlərinə görə, mülki infrastruktura hücumlar dəhşətli və yanlışdır.

"Biz bu müharibədə oxşar halları artıq görmüşük, lakin qəti bir şey haqqında danışmaq hələ tezdir",- deyə siyasətçi vurğulayıb.

Sunak qeyd edib ki, Britaniya Ukraynaya humanitar yardım təklif etməklə bu hücuma dərhal cavab verib:

"Biz həm BMT, həm də Qırmızı Xaç təşkilatına bu kimi vəziyyətlərə cavab vermək üçün artıq resurs və maliyyə ayırmışıq. İndi onlar resursları başqa şeylərlə yanaşı, ərazidə humanitar yardım və evakuasiyaya kömək etmək üçün yönləndirə bilərlər", - deyə siyasətçi əlavə edib.

Daşqın Həsənov
Missiya.Az