Rusiyada azərbaycanlıların həbs dalğası ölkələr arasında mədəni dialoqa təsir göstərə bilməz.

Missiya.Az xarici mediya istinadən xəbər verir ki, bunu Rusiya Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy deyib.

Onun sözlərinə görə, Yekaterinburqdakı həbslər sırf cinayətkarlığa qarşı mübarizədir. Rusiya nə Azərbaycanda, nə də Rusiya Federasiyasında azərbaycanlı icmaları üçün mədəni tədbirləri ləğv etməyəcək. 

Şvıdkoy onu da bildirib ki, Azərbaycanda rus mədəniyyətinin ləğvi mümkün deyil.  Həbslər zamanı mümkün pozuntulara gəlincə, əgər belə hallar müşahidə olunarsa, o zaman avtomatik olaraq Rusiya prokurorluğunun yurisdiksiyasına keçəcəklər.

Xatırladaq ki, iyunun 27-si səhər saatlarında Rusiya Federal Təhlükəsizlik Xidməti Yekaterinburq şəhərində azərbaycanlıların yaşadığı evlərə basqın edib. Hadisə zamanı 2 azərbaycanlı öldürülüb, bir neçə nəfər saxlanılıb. Bundan sonra Azərbaycan Mədəniyyət Nazirliyi ölkədə Rusiya mədəniyyət tədbirlərini ləğv edib.  

Nurlana Əhmədova
Missiya.Az