Bu gün bəstəkar, Azərbaycan SSR xalq artisti Aqşin Əlizadənin doğum günüdür.

Missiya.Az xəbər verir ki, sənətkar 1937-ci ildə Bakıda dünyaya göz açıb.

Tələbə vaxtı yazdığı sonata Gənc Bəstəkarların I Ümumittifaq Müsabiqəsində I dərəcəli, sonra yazdığı Birinci simfoniya "Zaqafqaziya Baharı" festivalında I diploma layiq görülüb. 16 simli alətlər üçün yazılan "Ekspressiya" əsəri aleatorik və sonor texnikası üçün maraqlı təcrübədir.

"Bayatılar" əsəri Azərbaycan musiqisində özünəməxsus eksperiment olaraq daha çox monodik xarakter daşıyır. Aqşin Əlizadənin yaradıcılığının ümumi cəhətləri virtuoz etnoqrafizm, dərin fəlsəfi ümumiləşdirmə, emosional genişlik, konstruktivlik, şərqsayağı əlvan dekor və ciddi forma mütənasibliyidir.

Əsas əsərlərinə "Babək" baleti, "Qafqaza səyahət" baleti, "Ümid valsı" baleti, 5 simfoniya, xor üçün "Bayatılar", "Təntənə", "Azərilər" kantatası, "Ana torpaq", "Qədim lay-lay", kamera orkestri üçün "Pastoral", "Aşıqsayağı", "Cəngi", "Kənd suitasi", "Uşaq süitasi", fortepiano üçün sonata, "Dastan", "Qədim oyunlar", "Portret", xoreoqrafiq simfoniya və s.  daxildir.

50-dən artıq bədii film, cizgi filmi, tamaşaya musiqi yazıb.

Bəstəkar 3 may 2014-cü ildə vəfat edib.

Zərintac Mayisqızı
Missiya.Az