“Biz 2025-ci ilin oktyabrında Azərbaycanda keçiriləcək Türk Dövlətləri Təşkilatının 12-ci sammitinə hazırlıq prosesini də nəzərdən keçirdik”.

Missiya.Az “TRT HABER”ə istinadən xəbər verir ki, bunu Türkiyə Prezidenti Rəcəb Tayyib Ərdoğan Macarıstan səfərindən qayıdarkən təyyarədə jurnalistlərin suallarını cavablandırarkən deyib.

O bildirib ki, Macarıstanda keçirilən sammit çərçivəsində Dövlət Başçıları Şurasının iclasında həmrəyliyimizi və əməkdaşlığımızı dərinləşdirmək üçün atılacaq addımları müzakirə etdik.

“Zirvə toplantısında Budapeşt Bəyannaməsindən əlavə, biz liderlər olaraq üç sənəd də qəbul etdik. Xarici işlər nazirlərimiz də dörd sənəd üzərində razılığa gəliblər. Bu kontekstdə Şimali Kipr Türk Respublikasının Türk Dünyasının ayrılmaz hissəsi kimi fəaliyyətimizə verdiyi töhfələri alqışlayan, Kipr Türklərinin təbii bərabər hüquqlarının təmin edilməsində Türk Dünyasının həmrəyliyini ifadə edən və adadakı mövcud reallıqlara əsaslanaraq həll yolunun tapılmasının vacibliyini vurğulayan bəyanatlar üzərində razılaşdıq”, - deyə siyasətçi vurğulayıb.

Daşqın Həsənov
Missiya.Az