“Avropadan gözləntilər Ermənistanda şişirdilib və reallığı əks etdirmir”.

Missiya.Az “Hraparak” nəşrinə istinadən xəbər verir ki, bunu Ermənistanın sabiq Prezidenti Robert Köçəryan mətbuat konfransı zamanı deyib.

Onun sözlərinə görə, Avropa ölkələrinin, xüsusən də Fransa Prezidenti Emmanuel Makronun bəyanatları rezonanslı və gözəl olsa da, əslində regional hadisələrə təsir göstərmir.

Köçəryan bildirib ki, bu regionda təhlükəsizlik məsələlərinə real təsiri olan üç güclü dövlət var ki, bunlar da Rusiya, İran və Türkiyədir.

O qeyd edib ki, Ermənistan üçün Rusiya ilə strateji müttəfiqlik bərpa edilməli və normallaşdırılmalıdır.

Eyni zamanda Köçəryan hazırki hakimiyyətin xarici siyasətini də şübhə altına alıb, onun xaotik olduğunu və dəqiq istiqaməti olmadığını vurğulayıb. 

Siyasətçi əlavə edib ki, belə davranış nəticəsində Ermənistan gözlədiyi dəstəyi ala bilməyib.

Daşqın Həsənov
Missiya.Az