İranın xarici işlər naziri Abbas Əraqçı və BƏƏ-nin xarici işlər naziri Şeyx Abdullah bin Zayed Əl Nəhyan Əbu-Dabidə ikitərəfli münasibətləri və regional hadisələri müzakirə ediblər.

Missiya.Az "Armenpress"ə istinadən xəbər verir ki, bu barədə İranın Tasnim agentliyi məlumat yayıb.

Tərəflər regional təhlükəsizlik və sabitliyin möhkəmləndirilməsi üçün iki ölkə arasında daha sıx əməkdaşlıq və koordinasiyaya ehtiyac olduğunu vurğulayıblar. Əraqçı İsrailin Qəzza zolağında və İordan çayının qərb sahilində fələstinliləri qətlə yetirməyə və köçürməyə davam etməsini, həmçinin İsrailin Livan, Suriya və Yəmənə qarşı hücumlarını pisləyib, İsrailin "işğalçılıq siyasətini və beynəlxalq hüququn davamlı pozulmasını" qəbuledilməz adlandırıb və onlara qarşı müvafiq tədbirlərin görülməsinin vacibliyini vurğulayıb.

Görüşdə İran və ABŞ arasında davam edən dolayı danışıqlar da müzakirə edilib. Əraqçı həmkarına danışıqlardakı son hadisələr barədə məlumat verib. Bundan əvvəl İran Xarici İşlər Nazirliyinin sözçüsü İsmail Bəqayi bildirmişdi ki, bu ölkənin xarici işlər nazirinin BƏƏ-yə səfəri qonşu ölkələrlə davam edən məsləhətləşmələr çərçivəsində baş tutacaq.

Zərintac Mayisqızı
Missiya.Az