“Ukrayna dərhal, tam və qeyd-şərtsiz atəşkəsdə israr edir və buna görə də sülhə gətirib çıxara biləcək formatların heç birini istisna etmir”.

Missiya.Az xəbər verir ki, bu barədə Ukrayna Prezident Volodimir Zelenski özünün “Teleqram” kanalında məlumat yayıb.

Onun sözlərinə görə, hələ martın 11-də ABŞ atəşkəslə bağlı Ukrayna ilə eyni mövqedə idi. Ancaq bu, yalnız müəyyən şərtlərdə mümkündür.

"Amma Rusiya bunu edəndə və qətlləri dayandırdıqda mümkündür. Pasxa bayramında biz döyüş əməliyyatlarının intensivliyinin azalmasına və hava hücumlarının olmamasına nail olduq. Ukrayna bu sükut vəziyyətini ən azı 30 gün uzatmağı və atəşkəs rejimini tamamlamağı təklif etdi", - deyə siyasətçi vurğulayıb.

O, Ukraynanın ən azı mülki hədəflərdə dərhal atəşkəsə hazır olduğunu bəyan edib:

“Bu, bütün tərəfdaşlarla birgə birinci prioritet olmalıdır”, - deyə Zelenski əlavə edib.

O qeyd edib ki, bu məqsədlə Parisdə görüşlər keçirilib, birinin isə bu gün Londonda keçirilməsi nəzərdə tutulub.

"Ukrayna dəfələrlə bəyan edib ki, atəşkəsə və daha da real sülhə gətirib çıxara biləcək formatların heç birini istisna etmir. Qətlləri dayandırmaq bir nömrəli vəzifədir. Mən buna diqqət yetirən və müharibənin sona çatmasına kömək edən hər kəsə minnətdaram", - deyə Zelenski bildirib.

Daşqın Həsənov
Missiya.Az