ABŞ Prezidenti Donald Trampın Amerika qoşunlarını Suriyadan çıxarmaq qərarı İsraili təşvişə salıb, çünki bu, Türkiyəyə Suriyada və bütövlükdə regionda təsirini əhəmiyyətli dərəcədə artırmağa imkan verəcək.

Missiya.Az xəbər verir ki, bu barədə “Ynet” məlumat yayıb.

Bildirilib ki, bu qərar İsrailin Vaşinqtonu regionda Amerika hərbçilərinin mövcudluğunu saxlamağa inandırmaq cəhdlərinə baxmayaraq verilib. Bu cəhdlər uğursuz olsa da, İsrail hərbi rəsmiləri bu qərarı nəzərdən keçirmək üçün ABŞ administrasiyası ilə dialoqlarını davam etdirirlər.

Qeyd olunub ki, bu gün Vaşinqton praktiki mərhələyə keçir, mütəmadi olaraq İsrail tərəfini gələcək fəaliyyətləri barədə məlumatlandırır. Məsləhətləşmələr zamanı İsrail nümayəndələri dəfələrlə belə bir addımın potensial nəticələri ilə bağlı dərin narahatlıqlarını ifadə ediblər.

“İsrail qorxur ki, belə bir inkişaf Türkiyənin Suriyada Bəşər Əsəd rejiminin devrilməsindən sonra mövcudluğunu gücləndirmək ambisiyalarına töhfə verəcək”, - deyə vurğulanıb.

Mənbənin sözlərinə görə, ABŞ kontingenti hazırda Suriyanın şərqində və şimalında bir sıra strateji nöqtələrdə yerləşdirilib və regional sabitliyin təmin edilməsində mühüm rol oynayır. İsrail ehtiyat edir ki, onların çəkilməsindən sonra Ankara əsas hərbi obyektlərə, xüsusən də Suriyanın Palmira bölgəsindəki T-4 və Tadmur bazalarına nəzarəti ələ keçirmək cəhdlərini gücləndirəcək.

Daşqın Həsənov
Missiya.Az