“Bu gün Rusiya Ermənistan iqtisadiyyatını enerji resursları ilə təmin edən əsas ölkədir. Qaz və neft məhsulları sabit və qurulmuş boru kəmərləri vasitəsilə Ermənistan üçün əlverişli şərtlərlə verilir. Əgər Ermənistan Avrasiya İqtisadi İttifaqından (Aİİ) çıxsa, qiymətlərin və tədarükü tənzimləyən vahid mexanizmlər fəaliyyətini dayandıracaq, bu da qazın, neft məhsullarının, elektrik enerjisinin qiymətlərinin qalxması deməkdir”.

Missiya.Az xəbər verir ki, bu barədə Moskvada Ermənistan İş Adamları Assosiasiyasının təşkil etdiyi biznes forum zamanı “Taşir” Şirkətlər Qrupunun prezidenti və Ermənistan İş Adamları Assosiasiyasının prezidenti Samvel Karapetyan məlumat verib.

“Ermənistanın bütün iqtisadiyyatı ciddi zərbə ala bilər ki, bu da iqtisadiyyatın ayrı-ayrı sahələrinin iflic olmasına və ölkənin iqtisadi sisteminin sabitliyinin pozulmasına gətirib çıxara bilər”, - deyə o vurğulayıb.

Karapetyan qeyd edib ki, təhlükəsizliyə xələl gətirə biləcək istənilən addım qısamüddətli siyasi hesablamalara deyil, real milli maraqlara əsaslanaraq diqqətlə nəzərdən keçirilməlidir.

Daşqın Həsənov
Missiya.Az