Avropanın enerji marşrutlarının və təchizat mənbələrinin şaxələndirilməsində Cənub Qaz Dəhlizi və Yunanıstan-Bolqarıstan Qaz İnterkonnektoru çərçivəsində həyata keçirilən əməkdaşlığımız müstəsna əhəmiyyət kəsb edir.
Missiya.Az "Report"a istinadən xəbər verir ki, bu barədə Azərbaycan xarici işlər nazirinin müavini Elnur Məmmədov Yunanıstanın Milli Günü münasibətilə Bakıda keçirilən rəsmi qəbulda danışıb.
O qeyd edib ki, ötən müddət ərzində Azərbaycan və Yunanıstan arasında iqtisadiyyat, energetika, nəqliyyat, elm və təhsil, mədəniyyət, turizm və bir sıra digər sahələrdə əməkdaşlıq əlaqələri inkişaf edib:
“Son illər ərzində ölkələrimiz arasında ali və yüksək səviyyədə mütəmadi olaraq səmərəli görüşlər keçirilir. 2022-ci il oktyabr ayında Azərbaycan Prezidenti İlham Əliyev Sofiyada Yunanıstan-Bolqarıstan Qaz İnterkonnektorunun açılış mərasimi çərçivəsində Yunanıstanın Baş naziri Kiriakos Mitsotakis ilə görüşüb. İki ölkənin liderləri arasında digər görüş ötən ilin noyabr ayında COP29 çərçivəsində keçirilib. Bu görüş ikitərəfli əlaqələrimizin möhkəmləndirilməsi istiqamətində növbəti əhəmiyyətli addım olub. Biz ölkələrimiz arasında yüksək səviyyəli siyasi dialoqu müsbət qiymətləndiririk. Xarici işlər nazirləri arasında ötən illərdə beynəlxalq platformalar çərçivəsində vaxtaşırı görüşlər keçirilib, qarşılıqlı maraq doğuran məsələlər ətrafında faydalı fikir mübadiləsi aparılıb. 2024-cü ilin mart ayında iki ölkənin xarici işlər nazirlikləri arasında Bakı şəhərində keçirilmiş siyasi məsləhətləşmələri məmnunluqla qeyd etmək istərdim”.
Nazir müavini vurğulayıb ki, enerji sahəsində əməkdaşlıq iqtisadi əlaqələrin əsas istiqamətlərindən biridir:
“Avropa İttifaqı ilə Azərbaycan arasında 2022-ci ildə Bakıda imzalanmış enerji sahəsində Strateji Tərəfdaşlığa dair Anlaşma Memorandumuna əsasən Avropaya ixrac olunan təbii qazın həcminin 2027-ci ilədək illik əsasda ən azı 20 milyard kub metrə çatdırılması niyyəti ifadə olunub”.
E.Məmmədov əlavə edib ki, Azərbaycan və Yunanıstan arasında ticarət-iqtisadi və turizm əlaqələrinin inkişaf etdirilməsi, o cümlədən qeyri-enerji sektorunda əməkdaşlığın genişləndirilməsi üçün qarşılıqlı maraq mövcuddur.
“Azərbaycan və Yunanıstan arasındakı münasibətlərin mühüm istiqamətlərindən birini humanitar sahədə əməkdaşlıq təşkil edir. Mədəniyyət, elm və təhsil sahələrində mübadilələr və şəhərlərarası əlaqələr insanlar arasında əlaqələri təşviq edən mühüm amillərdəndir. Ölkəmizdə yunan dilinə maraq göstərənlər üçün, o cümlədən dövlət universitetlərimiz nəzdində yunan dili və mədəniyyətinin tədrisi mərkəzləri fəaliyyət göstərir”, - nazir müavini söyləyib.
