“ABŞ və ya İsraillə əməkdaşlıq edən istənilən dövlət döyüş meydanında hədəf kimi görünəcək” – İranlı komitə sədri 

İran Məclisinin Milli Təhlükəsizlik və Xarici Siyasət Komitəsinin sədri İbrahim Əzizi ABŞ-nin təhdidlərinə cavab olaraq, iranlıların İslam Respublikası ərazisinə müdaxilə edəcək  hər kəsin ayağını kəsəcəklərini vəd edib.

Missiya.Az İran mediasına istinadən xəbər verir ki, İbrahim Əzizi ölkəsinin təhlükəsizliyinə qarşı yönəlmiş cəhdlərdən danışarkən bu istiqamətdə istənilən real addımın sərt qarşılığı olacağını bəyan edib: "Hər hansı bir təcavüzkar İranın müqəddəs ərazisinə ayaq basarsa, biz onun ayağını kəsəcəyik. Biz heç bir müharibənin təşəbbüskarı olmamışıq, lakin təcavüzkarlarla qəti və sərt şəkildə mübarizə aparmağı öyrənmişik", - Əzizi  IRNA agentliyinə müsahibəsində vurğulayıb.

 İranlı parlamentari əlavə edib: "Sionist rejim (İsrail nəzərdə tutulur) və ABŞ bilməlidirlər ki, saxta bəhanə ilə milli təhlükəsizliyimizə zərrə qədər də ziyan vurmağa çalışsalar, artıq dünyanın heç bir yerində özlərini təhlükəsiz hiss etməyəcəklər". 

Əzizinin sözlərinə görə, ABŞ və ya İsraillə əməkdaşlıq edən istənilən dövlət İran tərəfindən döyüş meydanında hədəf kimi görünəcək.

Elcan
Missiya.Az