Pakistan təhlükəsizlik qüvvələri “Bəlucistan Azadlıq Ordusu”nun yaraqlıları tərəfindən ələ keçirilən qatarın girov saxlanılan azı 155 sərnişinini azad edib, 30-a yaxın ekstremisti öldürüb.

Missiya.Az xarici mediaya istinadən xəbər verir ki, bu barədə “Geo” telekanalı məlumat yayıb.

Girovların azad edilməsi əməliyyatının davam etdiyi bildirilir. Hücumda iştirak edən yaraqlıların dəqiq sayı məlum deyil. Həmçinin qeyd olunub ki, azad edilmiş 17 girov "təcili tibbi yardım" göstərilməsi üçün xəstəxanaya yerləşdirilib.

Telekanalın məlumatına görə, hücum edənlər qatarı Əfqanıstan və İran sərhədləri yaxınlığındakı ucqar bir bölgəyə aparıblar. Girovların azad edilməsi üçün xüsusi əməliyyat başladıqdan sonra döyüşçülər kiçik qruplara bölünüblər. Təhlükəsizlik qurumlarındakı mənbələr iddia edir ki, ekstremistlər peyk telefonlarından istifadə edirlər və Əfqanıstanda olduğu güman edilən hücumun təşkilatçıları ilə əlaqə saxlayırlar.

Xatırladaq ki, dünən günorta saatlarında silahlılar qatarda 450 sərnişini girov götürüblər. Onlar dəmiryol relslərini partladıb, sonra qatara atəş açıblar. Maşinist yaralanıb.

Zərintac Mayisqızı
Missiya.Az