Ukraynanın Avropa İttifaqına (Aİ) daxil olması ölkənin suveren hüququdur.

Missiya.Az xəbər verir ki, bunu Kremlin rəsmi nümayəndəsi Dmitri Peskov deyib.

"Bəli, bu, hər bir ölkənin suveren hüququdur. Söhbət inteqrasiyadan, iqtisadi inteqrasiya proseslərindən gedir. Burada isə təbii ki, heç kim heç bir ölkəyə nəyisə diktə edə bilməz. Və biz bunu etməyəcəyik", - Peskov bildirib.

Kremlin nümayəndəsi əlavə edib ki, müdafiə və ya hərbi ittifaqlarla bağlı məsələlərdə tamamilə fərqli mövqe var. O vurğulayıb ki, Rusiyanın sözügedən istiqamətdə fərqli yanaşması var və bu hamıya yaxşı məlumdur.

Xatırladaq ki, bir gün əvvəl Macarıstanda hakim FİDES (Xristian Demokratik Xalq Partiyası) partiyasının nümayəndəsi Tamas Mençer bəyan etmişdi ki, Ukrayna tələblərə cavab vermədiyi üçün Aİ və NATO-nun üzvü olmamalıdır.

Zərintac Mayisqızı
Missiya.Az