Kredit götürmək istəyən bəzi vətəndaşlar faiz dərəcələrinin yüksək olmasından şikayətlənir. Faiz hətta götürülən pulun məbləğindən daha çox olur. Bu da bəzi şəxsləri çətinliyə salır. Maddi durumun zəifliyi və ya digər səbəblərdən ödəmə gecikdiriləndə faiz daha da artır.

Bank üzrə ekspert, hüquqşünas Əkrəm Həsənov Missiya.Az-a açıqlamasında deyib ki, faiz dərəcəsi, xüsusilə də kreditin faiz dərəcəsi kredit riskinin göstəricisidir:

“Kredit riski məbləğin qaytarılmama, ya da qaytarılmasındakı problemlərin yaranması ehtimalıdır. Banklar, bank olmayan kredit təşkilatları, lombardlar pulu əsas əmanətçilərdən götürür. Əmanətçilər də 10-12 faizlə verir. Banklar da öz növbəsində onun üstünə faiz qoyur ki, xərclərini, işçilərin maaşını və s. ödəsin. Eyni zamanda, risklər baxımından da banka vəsait lazım olur. Kredit qaytarılmayanda da xərclər ortaya çıxır. Belə ehtimallar nə qədər çoxdursa, faiz də o qədər qalxır. Bütün bunlar müştərinin etibarlı olmasından asılıdır”.

Əkrəm Həsənov bildirib ki, bankların faizi əslində nisbətən daha aşağıdır: 

“Onlar əmanət cəlb edir. Bank olmayan kredit təşkilatında faiz daha yüksəkdir. Çünki onlar da əsasən banklardan məbləğ götürürlər. Lombardlar isə onlardan da bahadır. Lombardlara vəsaiti əldə etmək baha başa gəlir”.

Zərintac Mayisqızı
Missiya.AZ