AZAL-a məxsus sərnişin təyyarəsinin qəzaya uğraması(vurulması) səbəbindən rəsmi Bakının Moskvaya qarşı haqlı iddiaları Kremli qeyri-adekvat davranışlara sövq edir. Moskva günahkarların cəzalandırılması istiqamətində addımlar atmaq və məsuliyyət daşıyan tərəf kimi davranmaq əvəzinə ölkəmizə qarşı informasiya təxribatları təşkil edərək ölkələrimiz arasındakı münasibətlərə və Azərbaycanın Kreml üçün ən ağır dönəmlərdə belə dostyana davranışlarına adekvat olmayan mövqe sərgiləyir. 

Rusiya tərəfi bu dəfə öz təxribatını Azərbaycanın CBC kanalı üzərində reallaşdırmağa çalışıb. Belə ki, adıçəkilən telekanalda rus dilində gündəlik yayımlanan "Это важно" analitik proqramının aparıcısı Rəşad Davud adından(süni intellekt vasitəsi ilə) feyk xəbər yayımlanıb. 

İddia olunub ki, guya Rusiya Azərbaycanla sərhədə hərbi qüvvə cəmləşdirir. Bunun feyk olduğunu CBC kanalı artıq bəyan edib. Göründüyü kimi, Rusiya hətta çirkin metodlara əl atmaqla məsuliyyətdən yayınmağa çalışır. 

Təəssüf ki Moskva bütün dünyanın ona qarşı birləşməsi gerçəkliyində belə Azərbaycanın müttəfiqlik prinsiplərinə sadiq qaldığını və bir çoxlarından fərqli olaraq sürüşkən mövqedə olmadığını unudub...