“İrəvan və Tbilisi arasında əməkdaşlıq möhkəmdir və gürcü tərəfi ikitərəfli tərəfdaşlığı daha da genişləndirməyə hazırdır”. 

Missiya.Az “Armenpress”ə istinadən xəbər verir ki, bunu Gürcüstanın xarici işlər naziri Maki Boçorişvili erməni həmkarı Ararat Mirzoyanla birgə mətbuat konfransında İrəvan və Tbilisi arasında 2024-cü il yanvarın 26-da imzalanmış “Strateji tərəfdaşlığın yaradılması haqqında” saziş haqqında danışarkən deyib.

“Bu gün biz bunları dərinləşdiririk və gələcəyə daşıyırıq. Biz bunu strateji tərəfdaşlıq adlandırmaqdan çox məmnunuq. Müxtəlif sahələrdə əməkdaşlığın məzmununu və miqyasını daha da genişləndirmək üçün böyük potensial var”, - deyə siyasətçi vurğulayıb.

“Biz daha da böyük nailiyyətlər əldə etməyə, bu əlaqələri və strateji tərəfdaşlıq səviyyəsini genişləndirməyə və zənginləşdirməyə hazırıq”, - deyə Gürcüstan XİN rəhbəri bildirib.

Xatırladaq ki, Ermənistanın Baş naziri Nikol Paşinyan və gürcü həmkarı İrakli Qaribaşvili 2024-cü il yanvarın 26-da Tbilisidə strateji tərəfdaşlıq sazişi imzalayıblar.

Daşqın Həsənov
Missiya.Az