Son zamanlar yeni bir virusun yayılması ilə bağlı narahatlıq artmaqdadır. Metapneumovirus adlanan xəstəliyə Çində, sonra isə Qazaxıstanda yoluxma halları qeydə alınıb. Bəs görəsən, həmin epidemiya pandemiyaya çevrilə bilərmi? Simptomları nələrdir? Kimlərin yoluxma riski yüksəkdir?

Suallarımızı cavablandıran Səhiyyə Nazirliyinin mütəxəssis-eksperti Zakir Quliyev deyib ki, metapneumovirus paramiksovirus dediyimiz virusların alt qrupudur:

“Bu virusun xəstəlik yaratma xüsusiyyəti daha çox immun sistemi zəifləmiş xəstələrdə, südəmər dövründə olan uşaqlarda və xroniki xəstəliyi olan şəxslərdə əsasən müşahidə edilir. Qripəbənzər digər respirator viruslar kimi öskürək, burun axıntısı, qızdırma, boğaz ağrısı kimi simptomlarla özünü büruzə verir”.

Həkimin sözlərinə görə, bu epidemiya yeni deyil:

“İlk dəfə 2001-ci ildə aşkarlanıb və zaman-zaman bəzi şəxslərdə qeydə alınıb. Sözügedən xəstəlik daha çox hava-damcı yolu, təmasla keçə bilir. “Pandemiyaya çevrilə bilərmi?” sualına cavab vermək hələ tezdir. Onu da vurğulayım ki, bunun üçün Ümumdünya Səhiyyə Təşkilatı (ÜST) da lazımi tədbirləri görəcəklərini açıqlayıb”.

Zərintac Mayisqızı
Missiya.Az