“ABŞ-də keçiriləcək prezident seçkisindən sonra yaranan qarışıqlıq Cənubi Qafqazda təhlükəsizlik boşluğu yarada bilər”. 

Missiya.Az “Sputnik-Armenia”ya istinadən xəbər verir ki, bunu erməni politoloq Suren Surenyants deyib.

O, bildirib ki, əgər ABŞ daxili problemlərə görə Rusiyanın Ukraynadakı vəziyyətlə məşğul olduğu bir şəraitdə Cənubi Qafqaza diqqətini zəiflətsə, bu, təhlükəsizlik boşluğuna gətirib çıxaracaq.

“Aydındır ki, Azərbaycan bu boşluqdan istifadə edə bilər”, - deyə politoloq vurğulayıb.

Surenyants qeyd edib ki, Vaşinqtonun regiona diqqəti istənilən halda azalacaq. Tramp seçilərsə, bu ehtimal yüksəkdir, lakin Kəmalə Harrisin seçkidə uğur qazanacağı təqdirdə də baş verəcək. Göründüyü kimi, region Vaşinqtonun prioritetləri sırasında deyil.

“Tramp qalib gəlsə, Ermənistan öz kursunu tamamilə yenidən nəzərdən keçirmək məcburiyyətində qalacaq. Təsadüfi deyil ki, Ermənistanın baş naziri Nikol Paşinyan seçkilərdən sonra Gürcüstan hakimiyyətini ilk təbrik edənlərdən biri oldu, çünki o da qərbyönlü siyasətinin tamamilə iflasa uğradığını anladı”, - deyə siyasətçi vurğulayıb.

Qeyd edək ki, ABŞ-də prezident seçkiləri noyabrın 5-də keçiriləcək.

Daşqın Həsənov
Missiya.Az