Xalq artisti Alim Qasımov qonaq olduğu müğənni İzzət Bağırovun aparıcılıq etdiyi “İzzət şou”da türk sənət musiqisinin “imperator”u İbrahim Tatlısəslə bağlı maraqlı açıqlamalar edib. 

Missiya.Az xəbər verir ki, o toyların birində Tatlısəsə mikrofon uzadıb amma türkiyəli sənətçi A. Qasımovla oxumadığını deyib.

“Allah İbrahim Tatlısəsə şəfa versin. Amma bir dəfə onun məclisinə məni dəvət etmişdilər. Bir dəfə oxudum. Bilirəm ki, Tatlısəs də bunu oxuyur. “Çərşənbə günündə, çeşmə başında...” zümzümə edib, mikrofonu ona verdim. Mikrofona da elə gözəl səs vermişdilər. Dedim ki, onunla birgə oxuyum. Mənimlə oxumadı. Sonra ikinci dəfə mənə söz verdilər. O mikrofonu elə günə qoymuşdular. Oxumaq qalsın, danışmaq da olmurdu. Allah şəfa versin. Nəysə. Bütün qeybətləri etdim burada, Allah qeybətə yazmasın. Bir dəfə də, cavan uşaq idim. Məclisə getmişdim. Bir dənə də böyük, tanınmış oxuyan gəlmişdi. Onun xəbəri olmadan mikrofonunu mənə verdilər. Ağzımı açan kimi, ömrümdə də yaxşı mikrofonla oxumamışam, uçuram. Gördüm oxuyan məni görən kimi mikrofonu çəkdi. Bir şey ki, Allahdan verilib, onun qabağını ala bilməzsən”, - Xalq artisti əlavə edib.

Zərintac Mayisqızı
Missiya.Az