Dünən UEFA Çempionlar Liqasının III təsnifat mərhələsinin cavab oyunları keçirilib. "Qarabağ" Bolqarıstan çempionunu öz yerində böyük hesabla məğlub edərək pley-off mərhələsinə yüksəldi. Lakin qardaş ölkə Türkiyənin “Fənərbaxça” klubu Çempionlar Liqasını tərk etməli oldu.

Missiya.Az xəbər verir ki, “Fənərin” uğursuzluğu Türkiyə mediasında baş məşqçi Joze Maurinyonun sərt tənqidlərə tuş gəlməsinə səbəb olub. Türkiyə futbol ictimaiyyəti Maurinyonun üfürülmüş təqdimatına uyğun komanda qura bilməməsini deyir və ona Azərbaycanın "Qarabağ" klubunun baş məşqçisi Qurban Qurbanovu misal göstərirlər. "Yaxşı olar ki, Maurinyo Qurban Qurbanovdan dərs alsın, sistemli oyun göstərən intizamlı komanda yaratmağın yollarını öyrənsin" deyən azarkeşlər “Fənərbaxça”nın yeni transferlərinin qiymətinə və onların bu qiymətlərə uyğun performans göstərə bilmədiklərinə də diqqət çəkirlər. Qeyd olunur ki, "Qarabağ" bahalı olmayan oyunçularla bütün Avropanı özünə heyran edir.

Elcan
Missiya.Az