Rusiyanın Qarabağdakı sülhməramlılarının komandanı 2 həftə ərzində artıq ikinci dəfədir ki, dəyişdirilir.
Komandan Rüstəm Muradovun vəzifə müddəti başa çatdığı üçün əvvəlcə onu Mixail Kosobokov əvəzləmişdi. Lakin Kosobokovun qaranlıq keçmişi, xüsusilə Gürcüstanın Abxaziya regionuna nəzarət edən Rusiya ordusunda rəhbər vəzifədə olması müəyyən suallar yaradırdı. Ona görə də siyasi ekspertlər Kosobokovun başqa bir hərbçi ilə dəyişdiriləcəyi barədə fikirlər səsləndirirdilər. Proqnozlar özünü doğrultdu və Kosobokov geri çağırıldı. Rusiyanın Qarabağdakı sülhməramlılarının yeni komandanı Gennadi Anakşindir. Artıq müdafiə naziri Zakir Həsənov Azərbaycan ərazisində müvəqqəti yerləşdirilən Rusiya sülhməramlılarının komandanı Gennadi Anakşini qəbul edib.
Missiya.Az xəbər verir ki, siyasi analitik Asif Nərmanlı Zakir Həsənov və Gennadi Anakşin görüşündə bəzi məqamlara diqqət çəkib.
Sitat: "Anakşini təqdim etmək üçün Bakıda olan Rüstəm Muradovun yanında Qarabağda cəmi iki həftə qalan Mixail Kosobokov olmaması xüsusi diqqət çəkdi. Ötən həftə Muradov Anakşin İrəvanda təqdim edərkən, Kosobokov da Ermənistan müdafiə naziri Arşak Karapetyanın görüşündə idi.
Kosobokovun İrəvandan fərqli olaraq, Bakıda olmaması onun vəzifəyə təyin olunandan cəmi iki həftə sonra geri çağırılmasında Azərbaycanın tələbinin rol oynadığı fikrini gücləndirir. Kosobokov bölgəyə gələn kimi Rusiya sülhməramlılarının indiyə qədər qeyri-adekvat fəaliyyətini daha açıq müstəviyə keçirdi: xəritə üzərində sülhməramlıların nəzarət bölgələrini genişləndirdi, Laçın dəhlizini genişləndirmək istədiyinə dair məlumatlar var idi və s", - sitatın sonu.
Asif Nərimanlı Kosobok regionda olarkən Azərbaycanın "əzələ nümayişi" barədə də maraqlı məqamlara toxunub.
Sitat: "Kosobokovun bölgədə olduğu vaxt diqqətçəkən hadisələrdən biri Azərbaycan əsgərinin Xocavəndin Cütcü kəndi istiqamətində 1200 metr irəliləməsi, danışıqlardan sonra geri çəkilməsi idi. istisna deyil ki, bu irəliləmə məhz Kosobokovun (ümumilikdə Rusiyanın) təxribatlarına cavab idi və orduya tapşırıq da möhkəmlənmək yox, “əzələ nümayişi” göstərməklə bağlı olub. Bu hadisədən bir neçə gün sonra Kosobokovun Qarabağda cəmi iki həftə çəkən fəaliyyətinə son qoyuldu. Anakşinin təyin olunması ilə sülhməramlılarının xəritəsində edilən dəyişikliklər də Bakının tələbinin Moskva tərəfindən nəzərə alındığının nümunəsi hesab oluna bilər və təbii ki, Rusiyanın geriçəkilməsi Bakı-Moskva xəttində anlaşılmazlıqların aradan qaldırılması ilə bağlıdır: İlham Əliyevin Rusiya və Türkiyə mediasına müsahibələrindən bu nəticəni çıxarmaq olar", - sitatın sonu.
Siyasi analitik bildirib ki, bu proseslər fonunda Anakşvinin təqdimatı zamanı Kosobokovun görüşdə olmaması da, Bakının onu qəbul etmək istəmədiyindən irəli gəlir. Və bu, Bakının Qarabağda adekvat addımlar atması baxımından müsbət məqamdır.Missiya.Az
