Azərbaycan Memarlıq və İnşaat Universitetində (AzMİU) 27 Sentyabr – Anım Günü münasibətilə tədbir keçirilib.

Missiya.Az xəbər verir ki, AzMİU-nun şəhid məzun və tələbələrinin xatirəsinə ucaldılmış Memorial-Xatirə Kompleksinin önündə düzənlənən tədbirdə şəhid ailələri, qazilər, müharibə iştirakçıları, universitet rəhbərliyi, müəllimlər və tələbələr iştirak ediblər.

Açılış mərasimindən öncə Dövlət Himni səsləndirilib, şəhidlərin əziz xatirəsi bir dəqiqəlik sükutla yad olunub. AzMİU-nun rektoru professor Gülçöhrə Məmmədova çıxış edərək Azərbaycan Prezidenti, Ali Baş Komandan İlham Əliyevin rəhbərliyi ilə Müzəffər Ordumuzun 44 günlük Vətən müharibəsində əldə etdiyi qələbədən danışıb.

Rektor bildirib ki, 30 illik işğala son qoyan parlaq qələbəmiz, eləcə də Qarabağ bölgəsində həyata keçirilmiş lokal antiterror tədbirləri dövlətimizin, xalqımızın gücünü bütün dünyaya bir daha göstərib.

Daha sonra şəhid ailələri və qazilər çıxış edərək torpaqlarımızın azadlığı, ölkəmizin suverenliyi uğrunda dövlətimizin apardığı mübarizədən söz açıblar və bu mübarizəni müqəddəs missiya adlandırıblar.

Zərintac Mayisqızı
Missiya.Az