“Vaşinqton danışıqların harada aparılmasından asılı olmayaraq, Bakı ilə İrəvan arasında birbaşa dialoqun tərəfdarıdır”.

Missiya.Az xarici KİV-nə istinadən xəbər verir ki, bunu ABŞ Dövlət Departamentinin sözçüsü Vedant Patel Azərbaycan və Ermənistan liderlərinin mayın 25-də Moskvada keçirilməsi planlaşdırılan görüşünü şərh edərkən deyib.

"Tərəflərin müzakirələri davam etdirmək niyyəti ilə bağlı xəbərləri alqışlayırıq. Yenə də əminik ki, sülh mümkündür və birbaşa dialoq bu problemlərin həllinin açarıdır. Tərəflər arasında birbaşa danışıqlar prinsipial əhəmiyyət kəsb edir və biz məmnunuq ki, onlar harada olursa olsun davam edir”, - deyə siyasətçi vurğulayıb.

Bildirilir ki, Patel bu məsələ ilə bağlı Moskva ilə Vaşinqton arasında “pərdəarxası danışıqların” olub-olmaması ilə bağlı suala birbaşa cavab verməyib.

Siyasətçi qeyd edib ki, diplomatik münasibətlərin təfərrüatlarına varmadan deyə bilərəm ki, Rusiya ilə belə ikitərəfli münasibətləri davam etdirməyimizin səbəblərindən biri, əlbəttə ki, ölkələrimizin qarşısında duran bir sıra məsələlərdir. 

Daşqın Həsənov
Missiya.Az