“Rusiya-Ukrayna müharibəsi başlayandan bəri Türkiyə qalıcı atəşkəs təmin etmək üçün sıx diplomatik trafik həyata keçirir”.

Missiya.Az “TRT HABER”ə istinadən xəbər verir ki, bunu Türkiyə Prezidenti Rəcəb Tayyib Ərdoğan Azərbaycan səfərindən qayıdarkən təyyarədə jurnalistlərin suallarını cavablandıran zaman deyib.

O bildirib ki, Rusiya-Ukrayna müharibəsi təkcə iki ölkə arasında deyil, həm də qlobal aktorların iştirak etdiyi böhrana çevrilib:

“Türkiyənin xarici işlər naziri Hakan Fidanın Moskvada apardığı danışıqlar nəticəsində Rusiya və Ukrayna arasında danışıqların ikinci mərhələsinin İstanbulda keçirilməsi qərara alınıb. Bu yolla İstanbulda sülh prosesi yenidən başlayacaq. Bu bəyanat bizim sülhə olan ümidimizi daha da artırdı. Biz sülh üçün səylərimizi davam etdirəcəyik və bundan sonra da çalışacağıq. Biz həm Rusiya, həm də Ukrayna ilə də əlaqə saxlayırıq. Biz əldə etdiyimiz sürəti davamlı sülh üçün bir fürsət kimi görürük. Hər görüşümüzdə bütün həmsöhbətlərimizə xatırladırıq ki, bu fürsəti əldən vermək olmaz. Həll daha çox dialoq və daha çox diplomatiya yolu ilədir. Biz bütün diplomatik gücümüzü və potensialımızı sülh üçün istifadə edirik”, - deyə siyasətçi vurğulayıb.

Daşqın Həsənov
Missiya.Az