Cənubi Qafqazda yaranan məsələləri ilk növbədə region ölkələri həll etməlidir.

Missiya.Az xəbər verir ki, bunu Rusiyanın xarici işlər naziri Sergey Lavrov İrəvanda erməni həmkarı Ararat Mirzoyanla danışıqlardan sonra keçirdiyi mətbuat konfransında deyib.

Onun sözlərinə görə, regional və beynəlxalq problemlərin müzakirəsi zamanı Cənubi Qafqazdakı vəziyyətə xüsusi diqqət yetirilib.

"Biz əminik ki, burada yaranan məsələləri ilk növbədə region dövlətləri həll etməlidir. Beynəlxalq təcrübədə nəzərdə tutulduğu kimi, regiondankənar ölkələrin iştirakına etiraz etmirik, ancaq bir şərtlə ki, onların fəaliyyəti gərginlik yaratmaq məqsədi daşımasın və heç vaxt heç bir yerdə müsbət nəticələrə gətirib çıxarmayan geosiyasi oyunların xeyrinə yerli dövlətlərin maraqlarını nəzərdən qaçırmasın", - Lavrov qeyd edib.

Rusiya XİN rəhbəri əlavə edib ki, Moskvanın mövqeyi gizli gündəmlər olmadan vicdanlı dialoqa hazır olan hər kəslə əməkdaşlığa açıqdır.

Zərintac Mayisqızı
Missiya.Az