“Ermənistanla Rusiya arasında münasibətlər çoxsahəli, uzunmüddətli və qarşılıqlı faydalı əməkdaşlıq üzərində qurulub”.

Missiya.Az “Hraparak” nəşrinə istinadən xəbər verir ki, bunu Ermənistanın xarici işlər naziri Ararat Mirzoyan rusiyalı həmkarı Sergey Lavrovla görüşü zamanı deyib.

Onun sözlərinə görə, Ermənistan və Rusiya Xarici İşlər nazirlikləri arasında yeni iki illik siyasi məsləhətləşmələr proqramının hazırlanması artıq başa çatıb və onun yaxın vaxtlarda imzalanması planlaşdırılır.

Mirzoyan həmçinin regional sabitlik və sülh məsələlərinə də ətraflı toxunaraq qeyd edib ki, Ermənistan Cənubi Qafqazda uzunmüddətli sülhün bərqərar olması istiqamətində ardıcıl addımlar atır. 

O bildirib ki, İrəvan Azərbaycan və Türkiyə ilə münasibətlərin normallaşması üçün səylərini davam etdirir.

"Biz səmərəli siyasi dialoqu davam etdirməyə və dövlətlərimizin və xalqlarımızın mənafeyi naminə qarşılıqlı faydalı əməkdaşlığı dərinləşdirməyə hazırıq", - deyə Mirzoyan əlavə edib.

Daşqın Həsənov
Missiya.Az