"Apple" iOS( Amerika şirkəti olan "Apple" tərəfindən hazırlanan mobil əməliyyat sistemi) növbəti süni intellekt ilə işləyən güc optimallaşdırma funksiyasını əlavə edəcək.

Missiya.Az xəbər verir ki, bu barədə "Bloomberg" məlumat yayıb.

Agentliyin məlumatına görə, iOS 19-un xüsusiyyətlərindən biri "iPhone"un batareyasının ömrünü uzadacaq texnologiya olacaq. Süni intellektə əsaslanan xüsusi alqoritm istifadəçinin vərdişlərini təhlil edəcək və onlardan asılı olaraq smartfonun enerji sərfiyyatını optimallaşdıracaq.

"Bloomberg"in müəllifi Mark Qurman bildirib ki, sözügedən iOS funksiyası cihaz sahibinin gün ərzində hansı proqram və xidmətlərdən istifadə edəcəyini proqnozlaşdıra biləcək. Bu hesablamalara əsasən, əməliyyat sistemi batareyadan enerji paylayacaq. Həmçinin, şəbəkəyə qoşulduqda “Apple” smartfonunun ekranında enerjinin doldurulmasının nə vaxt başa çatması barədə məlumat göstəriləcək.

Zərintac Mayisqızı
Missiya.Az