"Ukrayna Rusiya ilə danışıqlarda heç bir ərazi güzəştinə getməyə hazırlaşmır".

Missiya.Az xəbər verir ki, bunu İtaliyanın “Corriere della Sera” qəzetinə müsahibəsində Ukrayna prezidenti Volodimir Zelenskinin aparatının rəhbəri Andrey Yermak deyib.

"Prezidentimiz açıq şəkildə bildirdi ki, istənilən ərazi məsələsi liderlər səviyyəsində, Ukrayna və Rusiya Prezidentləri arasında müzakirə olunmalıdır. Bundan başqa, Zelenski həmişə təkrar edib ki, biz Ukraynanın işğal olunmuş ərazilərini heç vaxt tanımamışıq və heç vaxt ərazilərimizdən imtina etməmişik", - Yermak bildirib.

O vurğulayıb ki, hazırda Rusiya tərəfi ilə təkcə mümkün görüşün yeri ilə bağlı deyil, həm də müzakirə olunacaq məsələlərin spektri və gözlənilən nəticələrlə bağlı danışıqlar aparılır:

"Görüş üçün mümkün yerlər kimi İsveçrə, Vatikan, Türkiyə və Fars körfəzi ölkələrindən biri hesab olunur. Ukrayna istənilən formatda, istər ikitərəfli, istərsə də üçtərəfli dialoqa hazırdır. Əsas odur ki, müharibəyə son qoyulsun. Biz ədalətli və davamlı sülh yaratmaq və təcavüzün təkrarlanmasının qarşısını almaq istəyirik"- o qeyd edib. 

Nurlana Əhmədova
Missiya.Az